मिति २०७६/०१/०७ गते बैतडी जिल्ला स्थित पालिका तहका प्रमुख, वडा अध्यक्ष र उपप्रमुख, उपाध्यक्षहरु संगको परिचयात्मक एवं अन्तरक्रियात्मक कार्यक्रम

2076-01-22

2076-01-22

---

मिति २०७६/०१/०७ गते प्र.जि.अ. श्री आनन्द पौडेल ज्यूको अध्यक्षता र जि.स.स. प्रमुख श्री सिद्ध राज भट्ट ज्यू को प्रमुख आतिथ्यतामा बैतडी जिल्ला स्थित पालिका तहका प्रमुख, वडा अध्यक्ष र उपप्रमुख, उपाध्यक्षहरु संगको परिचयात्मक एवं अन्तरक्रियात्मक कार्यक्रम सम्पन्न गरियो ।

• विपद् जोखीम न्युनिकरणका लागि पूर्व तयारी तथा प्रतिकार्य योजना सम्बन्धमा :

निर्णय : बैतडी जिल्ला आगलागी, डढेलो, पहिरो, चट्याङ्ग, बाढी जस्ता प्रकोपहरुको उच्च जोखिममा रहेको हुदा त्यस्ता जोखिमहरुको न्युनिकरण तथा व्यवस्थापन गर्न स्थानीय तहहरुले आ-आफ्नो क्षेत्रको विपद् जोखिम स्थानहरुको पहिचान गरि विपद् पूर्व तयारी तथा प्रतिकार्य योजना, २०७६ तत्काल निर्माण गर्ने र सो को योजना जिल्ला प्रशासन कार्यालयमा पठाउने । यसरी प्राप्त योजनालाई अन्य सरोकारवाला गै.स.स./नागरिक समाज, रेडक्रस र सार्वजानिक निकायहरु समेतको छलफल र परामर्शको आधारमा बैतडी जिल्लाको विपद् पूर्व तयारी तथा प्रतिकार्य योजना २०७६ तयार गर्ने सहमती गरियो ।

•  स्थानीय पूर्वाधार बिकास कार्यक्रम सम्बन्धमा :

निर्णय : यस बैतडी जिल्लाका स्थानीय तहहरुले सभाबाट स्विकृत बजेटको कार्यान्वयन तथा पूर्वाधार विकासका कार्यक्रमहरुलाई दिगो एवं विपद् जोखिम मुक्त बनाउन तपशिलका कृयाकलापहरुलाई मुल आधार बनाई कार्य सम्पादन गर्ने प्रतिवद्धता व्यक्त गरियो ।

तपशिल :

• जथाभावी एवं आर्थिक अनियमितता हुने गरी खर्च नगर्ने ।
• यस भन्दा पहिले सहमती र प्रतिवद्धता भए बमोजिम DPR निर्माण गरी IEE/EIA गरेर मात्र सडक लगायतका पूर्वाधार निर्माण गर्ने ।
• उपभोक्ता समितिको गठन व्यवस्थापन एवं संचालन गर्दा पर्याप्त जनसहभागिता जुटाउने ।
• पूर्वाधार बिकासका योजनाको संचालन गर्दा विपद् न्युनिकरण मैत्री एवं दिगोपनामा ध्यान दिने । जस्तै: सडक बनाउँदा Drainage अनिवार्य बनाउने ।
• निर्माणाधिन एवं नवनिर्मित ग्रामिण तथा नगरस्तरीय सडकहरुमा Route permit का लागि आवश्यक पहल गर्ने र अनुमती प्राप्त भए पछी मात्र यातायातका साधनहरु संचालन गर्न अभिप्रेरित गर्ने ।

• सूचना अधिकारी र गुनासो सुन्ने अधिकारी (Nodal Officer) तोक्ने सम्बन्धमा ।

निर्णय : यस जिल्लाका १० वटै स्थानीय तहहरुले तत्काल सूचना अधिकारी र गुनासो सुन्ने अधिकारी तोकी सोको जानकारी ७ दिन भित्र जिल्ला प्रशासन कार्यालय, बैतडीलाई दिने सहमती गरियो ।

• जिल्लाको शान्ति सुरक्षा सम्बन्धमा ।

निर्णय : जिल्लाको शान्ति सुरक्षालाई प्रभावकारी बनाउन स्थानीय तहहरुले आवश्यक सहयोग तथा समन्वय गर्ने सहमती गरियो ।

• नागरिकताको बिषय सम्बन्धमा :

निर्णय : स्थानीय तहबाट नागरिकता सिफारिसमा हुने कमिकमजोरीहरुलाई न्यूनिकरण गर्न र नागरिकता वितरणलाई सहज बनाउन तपशिल बमोजिम गर्ने सहमती गरियो ।

तपशिल :

• नयाँ नागरिकता(वंसज/बैबाहीक अंगिकृत) अनुसूची फाराम र प्रतिलिपि अनुसूची फाराम सिफारिस गर्दा शुद्धाशुद्धिमा यथोचित ध्यान दिने ।
• अनुसूचिमा भएका फोटोहरु प्रमाणीत गरी पठाउने ।
• आवश्यकता अनुसार जन्म दर्ता, बिबाह दर्ता, मृत्यु दर्ता संलग्न राखी पठाउने ।
• छोरा/छोरी, आमा/बुबाको नाम, थर फरक परेमा आवश्यक छानविन गरी एउटै नाम, थर भएको भनि प्रमाणित सहित सिफारिस गर्ने ।
• विदेशी मुलुकमा लामो समय बसी वा बिदेशी मुलुकमा जन्म भएका व्यक्तिहरुको हकमा विदेशी मुलुकको राष्ट्रियता जनाउने पहिचानपत्र (आधार कार्ड/भोटर आइ डि/पिनकार्ड/पि.आर. आदि) र विदेशी मुलुकको नागरिकता प्रमाणपत्र लिए/नलिएको एकीन गरी नलिएको भए मात्र नेपाली नागरिकता प्रमाण-पत्रका लागि सिफारिस गर्ने ।
• नाता प्रमाणीत गर्दा स्पष्ट हुने गरी नाता खुलाई फोटो सहित प्रमाणीत गरी पठाउने ।
• नागरिकता प्राप्तिका लागि सनाखत गर्ने व्यक्ति आमा/बुबा/दाजु/भाई नभएको हकमा तीन पुस्ता भित्रको हुनु पर्ने र सोको नाता प्रमाणित गरी सिफारिस पठाउने ।
• वडा अध्यक्ष/वडा सचिवहरुलाई नागरिकता तथा अन्य सिफारिसका सम्बन्धमा अभिमुखिकरण तालीमको व्यवस्था गर्ने र सो का लागि आवश्यकता अनुसार जिल्ला प्रशासन कार्यालयले सहजिकरण गर्ने ।

• प्रतिनिधि सभाबाट पारित भएको लैंगिक हिंसा सम्बन्धी संकल्प प्रस्तावको कार्ययोजना कार्यान्वयन सम्बन्धमा :

निर्णय : स्थानीय तहहरुले उपरोक्त संकल्प प्रस्तावको कार्ययोजनाको मासिक प्रगती विवरण अर्को महिनाको २ गते सम्म जि.स.स.मा पठाउने र जि.स.स.ले एकिकृत गरी ३ गते सम्म जिल्ला प्रशासन कार्यालयमा तल उल्लेखित ढांचामा पठाउने व्यवस्था गर्ने सहमती भयो ।

....................... महिनाको स्थिति/अवस्था
	पिडित महिला र हिंसाको विवरण	पिडित पक्षको नाम,थर, वतन	हिंसाको प्रकार	सूचकको नाम,थर, वतन	हिंसा सम्बोधन गर्न गरिएको प्रयास	महिला सशक्तिकरणका लागि गरिएका प्रयासहरु

महिला हिंसाको प्रकार :-

• घरेलु हिंसा- शारीरिक/मानसीक/यौनजन्य/आर्थिक
• बालविबाह/बहुविबाह
• लैङ्गिक हिंसा- डरत्रास/धम्की/पारश्रमिक नदिने ।
• गम्भिर प्रकृतिका- ज.ज.करणी/ज.ज.क.उ./मा.वे.ओ.प./गर्भपतन/कर्तव्य ज्यान